CAPIZ-Nakaeksperyensya sang delikado nga lebel sang kainit ang syudad sang Roxas matapos nga naglab-ot sa 42 degrees Celsius ang heat index subong nga Martes, Nobyembre 3, 2026, samtang 40 degrees Celsius naman ang naitala sa banwa sang Mambusao, suno sa pinakabag-o nga datos sang Department of Science and Technology–Philippine Atmospheric, Geophysical and Astronomical Services Administration ukon DOST-PAGASA.
Suno sa datos, yara sa DANGER level ang 42°C nga heat index sa Roxas City, samtang yara naman sa EXTREME CAUTION level ang 40°C nga heat index sa Mambusao.
Ang heat index amo ang nagakombinar sang temperatura sang hangin kag relative humidity agud mahibaluan ang aktuwal nga kainit nga mabatyagan sang lawas sang tawo. Bangud sini, mahimo nga mas mabatyagan nga mainit ang palibot sang sa aktuwal nga temperatura nga ginarekord.
Sa danger level, daku ang posibilidad nga makaeksperyensya sang heat cramps kag heat exhaustion ang mga tawo nga madugay nga na-expose sa mataas nga heat index. May posibilidad man sang heat stroke kon magpadayon ang exposure kag indi gilayon mahatagan sang nagakaigo nga pagpabugnaw ang lawas.
Samtang, sa extreme caution level, posible man ang heat cramps kag heat exhaustion, ilabi na sa mga nagahimo sang mabug-at nga pisikal nga aktibidad sa guwa.
Bangud sini, ginapahanumdom ang publiko nga masami mag-inom sang bastante nga tubig agud malikawan ang dehydration, kag likawan ang direkta nga pagbilad sa adlaw. Ginapanugyan man nga limitahan ukon likawan ang mabug-at nga mga aktibidad sa guwa, ilabi na sa tunga sang alas onse sang aga tubtob alas kuwatro sang hapon, kon san-o mas mabaskog ang kainit.
Ginapahanumdom man ang mga pumuluyo nga magdala sang payong, magsuksok sang kalo kag maluag ukon magaan nga panapton kon kinahanglan magguwa sang balay. Ginarekomendar man nga likawan ang sobra nga pagkonsumo sang mga ilimnon nga may caffeine kag makahulubog bangud mahimo ini makadugang sa risgo sang dehydration.
Ginalantaw nga mas kinahanglan ang pagpangapin sang mga kabataan, tigulang, kag mga indibidwal nga nagatrabaho sa guwa bangud mas delikado sila sa mga balatian nga may kaangtanan sa sobra nga kainit.
Sa pihak sang nagataas nga heat index, ginapanawagan ang tanan nga maghalong kag indi pagbalewalaon ang mga sintomas sang heat-related illnesses pareho sang pagkaluya, pagkalipong, pagsakit sang ulo, pagsuka kag sobra nga pagpamula ukon pag-init sang panit.
