Naglab-ot na sa 443 ka barangay sa Capiz ang nadeklarar nga drug-cleared, gikan sa kabug-usan nga 473 ka barangay sa probinsya.
Sa interview sang Bombo Radyo kay Agent V Jury Rocamora, Provincial Officer sang Philippine Drug Enforcement Agency PDEA-Capiz, iya ginpahayag nga base sa inter-agency monitoring, 443 na ka barangay ang nakapasar kag nadeklarar nga drug cleared.
Suno kay Rocamora, 30 ka barangay ang wala pa ma-deklarar nga drug-cleared, diin 27 ang yara sa Roxas City kag duha naman sa banwa sang Panitan.
Apang ginpahanumdom niya nga bisan drug-cleared na ang isa ka barangay, padayon gihapon ang monitoring sang kapulisan kag PDEA.
Posible man nga ma-revoke ang status sini kon indi mapunggan sang barangay ang mga aktibidad may kaangtanan sa ilegal nga droga.
Suno pa kay Rocamora, daku ang responsibilidad sang barangay officials sa pagmintinar sang ila drug-cleared status, lakip na ang pagpalig-on sang monitoring sa mga drug personalities kag pagpugong sa mga persona halin sa iban nga lugar nga nagabakal ukon nagagamit sang ilegal nga droga sa ila barangay.
Ginpaandam man niya nga kon may nahibaluan nga nagagamit sang ilegal nga droga nga wala nalakip sa BADAC list, posible nga mag-atubang sang administrative case ang concerned nga barangay official.
Dugang pa sang natungdan, handa ang PDEA nga magbulig sa mga barangay officials kon may mamonitor sila nga drug surrenderer ukon drug personality nga nagbalik sa pag-engage sa ilegal nga droga.
