ROXAS CITY – Pilason nga ginpadangat sa isa ka pribado nga ospital sa syudad sang Roxas ang isa ka 32 anyos nga ginang matapos nga natumba sa ginasakyan sini nga motorsiklo sa Barangay Malocloc Norte, Ivisan, Capiz.
Ginkilala ang biktima kay Mary Jane Angcaya, 32 anyos sang Barangay Poblacion, Sapian, Capiz apang temporaryo nga nagapuyo sa Barangay Poblacion, Ivisan, Capiz.
Base sa imbestigasyon sang Ivisan Municipal Police Station nga naggikan sa Malocloc Norte ang biktima padulong kuntani sa ginatiniran sini nga boarding house sa amo nga banwa kaupod ang iya sini bana nga si Danmer Cerano, 30 anyos sang hinali na lamang nga may nagtabuk nga layaw nga ido rason nga nadulaan ini sang kontrol sa pagmaneho.
Bangud diri, nag-angkon sang mga kapilasan sa lawas ang nasambit nga ginang nga gilayon naman gindapatan sang nagakaigo nga pagbulong.
