ROXAS CITY – Daan nga hiligut-anon ang ginatan-aw nga motibo sa paglabo sa 46-anyos nga lalaki sa Sitio Pirara, Poblacion, Sapian, Capiz.
Nag-angkon sang samad sa liog ang biktima nga si Manuel Parohinog sang ginlabo sang suspek nga si Omar Lubin nga karon nakahunong na sa karsel sang Sapian PNP.
Ginpahayag ni Police Staff Sergeant Jebie Villasis, imbestigador sang Sapian PNP nga ba-se sa inisyal nga imbestigasyon sang kapulisan nagaguwa nga samtang nagalakat ang biktima kaupod ang amay kag utod ila nga nasugat-an sa karsada ang suspek nga may dala nga sanduko.
Nakaangkon sang pagbaisay ang magtimbang nga bahin tobtob ginlabo sang suspek si Manuel nga gilayon gindala sa ospital bangud sa naangkon nga kasamaran.
Samtang ginturn over naman sa mga pulis ang sanduko nga gingamit sa paglabo sa biktima.
Nahibaluan nga lunsay yara sa impluwensiya sang makahulubog nga ilimnon ang apat sang nagluntad ang insedente.
