Naglab-ot sa mas ukon menos 467,000 ka mga indibidwal ukon katumbas sang 132,000 ka mga pamilya halin sa 850 ka mga barangay sa Visayas kag Mindanao ang naapektuhan sang bagyo Basyang, suno sa Office of Civil Defense (OCD).
Ginreport ni OCD spokesperson Junie Castillo nga may 12 ka mga napatay, nga gina-beripika pa sa subong. Apat sa mga ini ang napatay bangud sa landslide sa Cagayan de Oro City, samtang ang iban ang nalumos. Sa Iligan City naman, lima ka mga tawo ang nareport nga napatay.
Narekord man ang 445 nagkalaguba nga balay, kun sa diin 38 ang dalayon nga nawasak akag 407 ang partially damaged. Nagapadayon pa ang clearing operations matapos nga nag-subside ang baha, samtang gina-consolidate pa ang report sa halit sa imprastruktura kag agrikultura.
Samtang, ginsiling sang DPWH nga may isa ka taytay kag isa ka flood control project ang naguba kag sa subong ginkaayo agud masigurado nga makaagi ang relief goods.
Nagpadala naman ang DSWD sang masobra 66,000 ka mga family food packs kag 6,000 ka mga ready-to-eat meals sa mga rehiyon nga tuman nga naapektuhan sang bagyo.
