SIGMA, CAPIZ – Patay ang 47-anyos nga lalaki matapos bumunggo ang ginamaneho sini nga tricycle sa kasugata nga pick-up nga salakyan sa Brgy. Mianay, Sigma, Capiz.
Ginkilala ang driver sang tricycle kay alias Mike, 45-anyos nga residente sang Brgy. Dinginan, Roxas City samtang ang driver sang salakyan ginkilala kay alias Junjun, 33-anyos nga residente naman sang Brgy. Pagbunitan, Sigma, Capiz.
Base sa impormasyon nga nagikan sa Sigma Municipal Police Station, ginapahayag nga samtang ginasubay ni alias Mike ang dalan sa Brgy. Mianay hinali nalang ini nadulaan sang kontrol sa ginamaneho sini nga tricycle bangud nakatapak sang stockpile rason nga bumunggo sa kasugata sini nga pick-up.
Nahibaluan nga nagikan sa Brgy. Amaga kag padulong kuntani sa Brgy. Parian ang driver sang pick-up samtang ang tricycle nagikan sa banwa sang Sigma kag padulong naman sa syudad sang Roxas.
Bangud sa mabaskog nga impact sang aksidente nga pagbungguanay, nag-angkon sang patal nga pilas ang driver sang tricycle sa magkatuhay nga parte sang lawas nga gilayon naman ginrespondehan sang katapo sang Sigma BFP kag Sigma ERT agud dapatan sang pauna nga pagbulong antes ginpadangat sa Dao District Hospital para sa nagakaigo nga pagbulong apang makaligad ang pila ka oras gindeklarar ini nga wala na sang kabuhi.
Sa karon, yara na sa isa ka punirarya ang nasambit nga biktima samtang ginkustodiya naman sa Sigma PNP ang driver sang pick-up kag ang mga behikulo nga imbolbado para sa nagakaigo nga disposisyon.
