ROXAS CITY-Ginkompirmar sang talatapan sang Provincial Disaster Risk Reduction and Management Office (PDRRMO) nga may yara sang nagpositibo sa rapid test nga isa sa 104 ka mga Locally Stranded Individual nga nagsakay sa mercy voyage nga nagdungka sa Culasi Port, Barangay Culasi Roxas City.
Ginpahayag ni Mrs. Judy Grace Pelaez, PDRRM officer nga isa ka 47-anyos nga ginang nga residente sang banwa sang Panitan ang nagpositibo sa ‘rapid testing’.
Suno sa kay Pelaez nga makaduha ka beses nga ginpaidalum sa rapid test ang ginang sa diin lunsay positibo ang resulta.
Apang gin-athag sini nga ‘Asymptomatic’ ang nag-positibo nga ginang kag yara sa maayo nga kondisyon sa Roxas Memorial Provincial Hospital.
Samtang ang 25 ka mga iban pa nga mga LSIs nga kaupod sang nag-positibo nga ginang ang lunsay nag-negatibo sa rapid testing kag nagpauli na sa mga tagsa ka mga kabanwahanan.
Ginkompirmar man ni Pelaez nga ang 78 ka mga LSIs nga taga siyudad sang Roxas ang lunsay nag-negatibo man sa rapid test kag gin-abisuhan nga magpaidalum sa strict home quarantine.
Natalana naman nga ipadalum sa Real-Time Polymerase Chain Reaction (RT-PCR) test ang nasambit nga ginang.
