Nakabaton sang tig-₱200,000 nga pinansyal nga bulig ang 47 ka barangay sa Syudad sang Roxas paagi sa Bawat Barangay Makikinabang Program (BBMP) sang administrasyon ni Presidente Ferdinand “Bongbong” Marcos Jr.
Ginpatigayon ang pagpanagtag sang pondo sa Hall of Governors sang Kapitolyo sang Agosto 11, 2026, nga ginpangunahan ni Gobernador Fredenil H. Castro, kaupod si Ex-Officio Board Member kag Liga ng mga Barangay-Capiz President Nico Yap.
Sa idalom sang programa, ang ₱100,000 sa kada barangay igapain para sa scholarship ukon educational assistance sang mga kwalipikado nga college students, samtang ang isa pa ka ₱100,000 igamit para sa mga proyekto kag serbisyo nga makabulig sa komunidad.
Ang 47 ka barangay nga nakabaton sang bulig amo ang Adlawan, Bago, Balijuagan, Banica, Barangay 1 tubtob Barangay 11 (Poblacion), Barra, Bato, Baybay, Bolo, Cabugao, Cagay, Cogon, Culajao, Culasi, Dayao, Dinginan, Dumolog, Gabu-an, Inzo Arnaldo Village (Cadimahan), Jumaguicjic, Lanot, Lawa-an, Libas, Li-ong, Loctugan, Lonoy, Milibili, Mongpong, Olotayan, Punta Cogon, Punta Tabuc, San Jose, Sibaguan, Talon, Tanque, Tanza, kag Tiza.
Ang BBMP isa ka programa sang administrasyon ni Presidente Marcos nga nagatinguha nga mahatagan sang direkta nga pinansyal nga suporta ang mga barangay sa nagkalain-lain nga bahin sang Pilipinas agud mapatuman ang mga proyekto kag serbisyo para sa kaayuhan sang mga residente.
