ROXAS CITY – Natigayon na nga mabalik ang suplay sang kuryente sa bilog nga probinsiya sang Capiz matapos ang pagpanalasa sang bagyo nga Ursula sa probinsiya.
Ini ang ginpahayag sang general manager sang Capiz Electric Cooperative nga si Engr. Edgar Diaz sang mainterview sang Bombo Radyo.
Suno kay Diaz nga sadtong Enero 14 pa natigayon nga nabalik ang suplay sang kuryente sa 473 tanan ka mga kabaranggayan sa bilog nga probinsiya.
Mas temprano ini suno sa iya sa ginpasalig sang talatapan nga sa Enero 15 mabalik ang kuryente sa mga kabaranggayan.
Ang Barangay Olotayan sa siyudad sang Roxas suno kay Diaz ang pinaka-katapusan nga napasiga sang talatapan bangud kinahanglan pa nila nga magtabok sa kalalawran.
Para naman sa mga balay nga totally-damaged ukon naguba, nagpanugyan si Diaz nga kun nakaayo na ang ila nga balay, direkta sila nga magpakig-angut sa CAPELCO para sa installation sang ila nga kuryente.
Gindugang pa sini nga likawan ang pagpatakod sang kuryente nga indi sang taga-CAPELCO.
Ginpanindugan pa ni Diaz nga ang tanan nga serbisyo nga ginahatag sang ila mga empleyado sa pagre-energize ukon pagbalik sang suplay sang kuryente ang wala sang bayad.
