ROXAS CITY – Nagabuylog ang tagdumalahan sang Capiz Provincial Health Office sa tuigan nga selebrasyon sang nutrition month sa kada bulan sang Hulyo.
Sa interview sang Bombo Radyo kay Ms. Josephine Moises, Nutrition Officer 3 sa Capiz PHO, ginpahayag sini nga sa karon nga ika-48 ka tuig nga pagsaulog sang nutrition month, may tema ini nga “New normal nga nutrisyon sama-samang gawin, gawan ng solusyon.”
Nagakahulugan nga sa karon nga tuig nga may yara pa sang ginapakigbatuan nga pandemya, dapat mangin mabinantayon kita sa mga pagkaon nga aton ginakaon.
Aminado ini nga isa sa factor sang malnutrisyon sa tawo amu ang epekto sang pandemya kun sa diin ang iban nga mga tawo ang nagdugang ang kabug-aton bangud sang mga indi masustansiya nga mga pagkaon.
Ginpahayag man sini nga sa ila datos sang tuig 2021, may gamay nga pagtaas sa porsyento sang malnutrisyon sa mga indibidwal sa probinsya.
Paalinton ni Moises nga dapat mangin mahinalungon sa mga ginakaon, kag mas maayo nga magtanum sang mga utan kag magkaon sang prutas agud malikawan ang malnutrisyon ilabi na sa mga kabataan.
