ROXAS CITY – Nakahunong na karon sa karsel sang Roxas City Police Station ang isa ka suspek samtang naka-hospital arrest naman ang kaupod sini kag padayon naman nga ginabulong sa Roxas Memorial Provincial Hospital ang biktima matapos ang nagluntad nga kinagamo sa isa ka KTV Bar sa Roxas Avenue, Barangay 8, Roxas City.
Ginkilala ang biktima kay Marcelino Dela Cruz, 49 anyos sang Barangay Lawaan, sining siyudad.
Base sa inisyal nga imbestigasyon sang Roxas City Police Station nga magkaupod ang biktima kag ang suspek nga nagainom-inom sa nasambit nga KTV Bar sang hinali na lamang naglaong ang biktima nga magapauli na ini.
Apang sang pag-abot sang biktima sa guwa sang amo nga KTV Bar hinali na lamang ini nga ginlampusan sang matig-a nga butang sa liog rason nga ini ang natumba.
Didto kag ginaalegar ginpulihan ini kastigo sang mga suspek nga sanday Johnny Boy Pacsoderon, 24 anyos sang Barangay Concencia, Panitan, Capiz kag si Carmelo Estorque, 40 anyos sang Barangay Lanot sining syudad kaupod ang (4) ka iban pa nga mga suspek.
Nag-angkon naman sang madamo nga mga kasamaran sa lawas ang amo nga biktima sa diin tuyo pa ini kuntani nga bun-on sang isa ka suspek apang madasig naman ini nakalikaw.
Samtang, ang isa ka suspek nga si Estorque ang nag-angkon naman sang pilas sa ulo matapos nga may naghaboy sa iya sang bote sang makahulubog nga ilimnon samtang ang suspek nga si Pacsoderon ang nag-angkon sang pilas sa kamot.
