ROXAS CITY – Pilason ang driver sang Honda Click motorsiklo matapos bumunggo sa likod sang 10-wheeler truck, kahapon nga adlaw sa Barangay Manhoy, Dao, Capiz.
Ginkilala ang driver kay Jomar Pasino, residente sang Passi City, Iloilo.
Sandig sa imbestigasyon sang katapo sang Dao Municipal Police Station, samtang ginasubay sang biktima ang dalan nagikan sa syudad sang Roxas padulong sa Dumarao sang hinali nalang nga nadulaan ini sang kontrol sa manubela, nga gintunaan sang iya pagka-aksidente.
Bangud diri, nag-angkon sang menor nga pilas sa magkatuhay nga parte sang lawas ang biktima kag gasgas sa iya motorsiklo.
Gilayon man ini nga ginrespondehan sang Dao Emergency Response Unit (DERU) kag ginpadangat sa Capiz Emmanuel Hospital para sa nagakaigo nga pagbulong.
Ginkustodiya sa Dao MPS ang imbulbado nga motorsiklo samtang padayon ang imbestigasyon sa nasambitan nga insidente.
