ROXAS CITY – Lima ka banwa sa probinsiya sang Capiz ang apektado sang baha nga tuga sang malain nga panahon.
Kalakip sa mga apektado sang baha ang banwa sang Jamindan, Panit-an, Maayon, Sigma kag Dao.
Sa exclusive interview sang Bombo Radyo Roxas kay Mrs. Judy Grace Pelaez, Action Officer sang Aksyon Tabang, ginpahayag sini nga indi na maagihan sa karon sang anuman nga sahi sang salakyan ang Barangay Lucero sa Jamindan, subongman ang Barangay Mangoso sa banwa sang Sigma, bangud sa pagtaas sang lebel sang tubig sa karsada.
May report nga evacuees man sa banwa sang Jamindan, sa diin tatlo ka pamilya sa karon ang nagatenir sa Jamindan Gym nga nagserbe nga evacuation center.
Samtang may report man sang landslide sa Barangay San Vicente, Jamindan sa diin nagpatigayon na sang clearing operation para maagihan na ini sang mga salakyan.
Sa karon naka-full alert ang mga ahensiya sang gobyerno kag padayon ang monitoring sa mga lugar nga apektado sang pagbaha.
