ROXAS CITY – Lima ka mga indibidwal ang ginpakustodiya sa Roxas City Police Station kasunod sang paglapas sa ginapatuman nga curfew hour sa siyudad sang Roxas.
Una diri, nadakpan sang mga naga-roving nga mga otoridad ang 30 anyos nga si Nick Mariano sang Parian, Sigma, Capiz nga nagalakat-lakat sa Barangay Lonoy, sining siyudad.
Dakop man nga nagalakat-lakat sa Barangay Lawaan sa oras sang curfew sanday Joel delos Reyes, 44 anyos kag Raffy Diestro, 25 anyos, lunsay mga residente sang Barangay Bolo.
Samtang, gindakop man sang mga otoridad ang duha ka mga Indian national nga temporaryo nga naga-estar sa Barangay Banica kag nagalakat-lakat sa Barangay 10, sining siyudad sa oras sang curfew kag yara pa sa idalom sang impluwensiya sang makahulubog nga ilimnon.
Ini amo sanday Baljinder Sibhu, 39 anyos kag Jastrret Sibhu, 24 anyos.
Mahibaluan nga ginapatuman sa karon ang province-wide curfew humalin alas 8 sa gab-i tubtob alas 5 sa aga bilang preventive measure bangud sang coronavirus disease (COVID-19) pandemic.
