Patay ang Lima ka mga babaye nga estudyante matapos nga nahulog sa madalom nga suba ang school bus nga ila ginasakyan sa probinsya sang Kandal, Cambodia.
Base sa police report, 26 ka mga estudyante nga naga-edad 12 tubtub 14 anyos ang sakay sang bus padulong sa eskwelahan sang hinali nga may nagtabok nga motorsiklo sa atubang sang madasig nga nagadalagan nga salakyan.
Bangud sini, gulpi lang nga nagtapak ang driver sang preno rason nga nag-skid ang bus kag sang ulihi nahulog sa isa ka suba sa higad sang dalan, 40 kilometers sa northern capital sang Phnom Penh.
Pila sa mga nasalbar ang ginpaidalum sa cardiopulmonary resuscitation ukon CPR.
Tatlo pa ka mga estudyante ang yara sa kritikal nga kondisyon, samtang 18 naman ang nakaangkon sang minor injuries.
Samtang, nadakpan naman ang 31 anyos nga driver kag gindala sa kustodiya sang kapulisan para sa pagpangusisa may kaangtanan sa insidente.
