Naghatag sang tig-₱20, 000 nga pinansyal nga bulig ang Barangay Dos, Roxas City sa lima ka college scholars sini nga kabarangayan bilang suporta sa ila pagpadayon kag pagtapos sang pagtuon.
Kabahin ini sang Bagong Pilipinas Barangay Scholars Program, nga may kabug-usan nga ₱100, 000 nga pondo para sa edukasyon sang lima ka benepisyaryo.
Ang mga nakabaton sang bulig amo sanday Edcel Begota Reyes, Arianne Marie Nerbal Bernales, Cristina Alsagon Arlante, Marjoeri Enoslay Acosta, kag Crismark Felomino.
Sa interview sang Bombo Radyo kay Barangay Kagawad Amor M. Betita, ginapaabot nila nga mangin inspirasyon sa mga iskolar ang ginhatag nga bulig agud magpadayon sa pagkab-ot sang ila mga handum. Ginpahayag man sini nga importante ang edukasyon bilang isa ka kapital para sa mas maayo kag mas masanag nga palaabuton.
Samtang, nakabenepisyo man ang Barangay Dos sa Presidential Assistance to Barangays (PAB) – Socio-Civic Projects Fund (SCPF), nga gintutuyo nga makahatag sang direkta kag mapuslanon nga suporta sa mga komunidad.
Paagi sa sini nga programa, nakabakal ang barangay sang 100 ka monoblock chairs kag duha ka steel pipe tents, nga maga-suporta sa nagkalain-lain nga aktibidad kag serbisyo para sa mga pumuluyo.
Suno pa kay Betita, ginpili ang mga monoblock chairs base sa ginapatuman nga kalidad kag specifications agud masiguro nga ini magapadayon nga magamit sa mas malawig nga tion. Samtang, padayon pa nga ginahimo ang duha ka custom-made steel pipe tents.
Nagpaabot naman sang pagpasalamat ang Barangay Dos sa Presidential Assistance to Barangays, nga suno sa barangay, daku ang kontribusyon sa pagpalig-on sang ila kapasidad sa paghatag sang mas maayo kag mapuslanon nga serbisyo kag pasilidad para sa komunidad.
