ROXAS CITY – Arestado ang lima ka mga persona sa ginkasa nga drug buy bust operation sang Philippine Drugs Enforcement Agency (PDEA) Capiz sa Brgy. Punta Tabuc, Roxas City.
Ginkilala ang mga arestado nga sanday Marlon Salazar Villarize, 25-anyos kag live-in partner sini nga si Marian Faye Alonzo Madiginog, 24-anyos lunsay residente sang Brgy. Lanot, Gilbert Basoy Limboy, 39-anyos, Jean Castillo Arzaga, 32-anyos lunsay residente sang Brgy. Punta Tabuc kag Daihann Ello Aroz, 35-anyos residente sang Brgy. Botungon, Estancia, Iloilo.
Nakuha sa nasambitan nga mga persona ang 18 tanan ka sachet sang suspected shabu kag ginabanta yara sa 15 gramo, P1,500 nga buy bust money; lima ka lighter, aluminum foil kag isa ka wallet.
Mahibaluan nga ang subject person sa ginpatigayon nga drug buy-bust ops amo si Marlon Bergantinos, 41-anyos residente sang Brgy. Punta Tabuc apang ini ang madasig nga nakapalagyo.
Matandaan nga si Bergantinos ang anay nadakpan man sa iligal nga droga sang tuig 2016.
Sa interview sang Bombo Radyo Roxas kay Provincial Director Gelly Robins Cataluña, PDEA-Capiz ginpahayag sini nga madugay na ang ila pag-monitor kay Bergantinos kag ang lugar kun sa diin nadakpan ang mga nasambit nga suspetsado.
Dugang pa sini nga si Bergantinos ang supplier sang iligal nga droga sa probinsya sang Capiz kag makabig nga high value target. Sa karun, padayon pa ang imbestigayon sa mga otoridad kag posible magapangatubang sang nagakaigo nga panumbugon ang mga nasambit nga nagkaladakpan.
