ROXAS CITY – Ginkumpirmar ni Department of Interior and Local Government (DILG) City Officer Gino Salamangca nga may yara sang lima ka mga punong barangay nga nagpadulong sa Baguio City agud magtambong sa isa ka seminar apisar nga may yara sang pamahog sang Coronavirus Disease (COVID-19) sa pungsod.
Suno kay Salamangca nga ang nasambit nga mga punong barangay amo sanday Punong Barangay Holce Bialen sang Barangay 8; Rey Afloro sang Barangay Balijuagan, Ma. Ligaya Condez sang Barangay Jumaguicjic; Herminia Dillo sang Barangay Tanque kag Joseph Tinoy sang Barangay 6 sining syudad.
Apang may walo naman ka mga punong barangay naman nga nagpa-iway sa pagtambong sang seminar nga ginalakipan nanday Punong Barangay Rufino Dunton sang Barangay 11; Reynaldo Magallanes sang Barangay Baybay; Reynaldo Alparaque sang Barangay Cogon; Teresa Almalbis sang Barangay Culasi; Mario Artillero sang Barangay Dumulog; Jocelyn Asis sang Barangay Lawa-an; Richard Arrojado sang Barangay Libas; kag Alfredo Albaladejo sang Barangay Tiza, Roxas City.
Ginpahayag ni Salamangca nga 13 kuntani ka mga punong barangay ang magatambong sa seminar apang sa padayon nga pagtaas sang kaso sang COVID-19 sa pungsod naghinyo ang alkalde sang syudad nga kun mahimo ipa-iway na lamang nila ang pagpadulong sa Baguio City.
Mahibaluan nga wala nakahibalo si Salamangca natuhoy sa pagtambong sang mga punong barangay bangud kay Roxas City Mayor Ronnie Dadivas sila nagpangayo sang clearance natuhoy sa ila nga paglakat.
Ang seminar nga pagatambongan sang mga punong barangay ang natuhoy sa Violence Against Women and Children (VAWC) kag wala ini malakip sa programa sang DILG.
Samtang suno naman sa kay City Health Office Dra. Lory Cahilog nga mahimo ipaidalom sa quarantine ang mga punong barangay nga nagtambong sa seminar.
