ROXAS CITY –Ginhatagan na sang sabat sang tagpamaba sang Provincial Health Office (PHO) ang nagalapta nga estorya angut sa ginaalegar dugang nga tatlo ka napatay nga Person Under Investigation (PUIs) sa probinsiya sang Capiz bangud sa coronavirus disease (COVID-19).
Ginpahayag ni Mr. Ayr Altavas nga ba-se sa datus nga ginauyatan sang talatapan, may 38 ka mga PUIs sa probinsiya nga nagapaidalum karon sa hospital quarantine.,sa diin natigayon na sila nga makuhaan sang specimen nga isa ka standard procedure sa pagdiagnose kun positibo ukon negatibo sila sa amo nga virus.
Sa nasambit nga numero sang mga PUIs, 25 diri ang nagguwa na ang resulta sa diin 24 ang negatibo kag isa lamang ang kumpirmado nga positibo sa COVID-19 nga karon padayon nga ginabulong sa Western Visayas Medical Center sa Iloilo.
Bangud diri, suno kay Altavas nga wala sang kamatuoran ang nagaguwa nga report nga nadugangan sang tatlo ang napatay bangud sa COVID-19 sa probinsiya.//
Suno pa sa opisyal nga si Patient No. 14 nga isa man ka PUI, ang napatay bangud sa congestive heart failure kag indi sa coronavirus disease amo man si Patient No. 18 nga negatibo ang resulta sa COVID-19.
Ginpahayag pa ni Altavas nga ang sunod sunod nga nagkalamatay nga tatlo ka mga PUIs ang ginahulat pa ang resulta sang ila nga specimen nga ginpadala na sa Iloilo for diagnosis.
Ang tatlo ka mga PUIs nga nagkalamatay sang damlag lang amo sanday Patient No. 30 nga isa ka lalaki kag naga-edad sang 65-anyos kag wala sang history of travel, Patient No. 32, isa ka babaye kag naga-edad sang 60-anyos kag may history of travel sa Pasay City samtang si Patient No. 35, isa ka lalaki kag naga-edad sang 47-anyos, wala sang history of travel.
Bangud diri, gindula ni Altavas ang pagkabalaka sang mga pumuluyo kag ginahinyo lamang ang kooperasyon sang tanan agud malampuwasan ini nga krisis nga ginapangatubang sang bilog nga kalibutan.
