ROXAS CITY – Ginkompirmar sang alkalde sang Tapaz nga lunsay ‘asymptomatic’ ukon wala nakitaan sang sintomas ang lima ka mga indibidwal nga dugang nga nag-positibo sa coronavirus disease (COVID-19) sa amo nga banwa.
Ini ang ginpahayag ni Mayor Roberto ‘Nonong’ Palomar sang mainterview sang Bombo Radyo.
Suno kay Palomar nga tatlo sa mga ini ang Returning Overseas Filipinos (ROF’s) nga ginalakipan sang 29 anyos nga lalaki nga residente nga may history of travel sa Dubai, UAE kag Metro Manila; 25 anyos nga lalaki nga residente nga may history of travel sa The Netherlands kag Metro Manila; 37 anyos nga lalaki nga may history of travel sa London kag Metro Manila.
Isa sa tatlo ka ROF’s ang residente sang Barangay Libertad kag taga-Barangay Poblacion naman ang duha.
Samtang ang isa naman ka Locally-Stranded Individual (LSI) nga nag-positibo ang taga-Barangay Salong nga 22 anyos nga babaye nga may history of travel sa Pasay City, Metro Manila.
Samtang isa naman ka Authorized Person Outside Residence (APOR) nga isa ka 24 anyos nga miyembro sang Philippine Army kag wala sang travel history ang isa nga nagpositibo.
Ginpahayag sang alkalde nga wala man sila nabudlayan bangud ang tatlo ka ROF’s kag isa ka LSI ang yara lamang nagatenir sa quarantine facility tubtob nagguwa ang resulta sang ila swab tests.
Gilayon man nga ginpatigayon ang contact-tracing sa mga nakahalubilo sang isa ka APOR bangud may mga ginkadtuan ini nga lugar samtang wala pa makaguwa ang resulta sang iya swab test.
Sa karon suno kay Palomar, yara na sa Roxas Memorial Provincial Hospital (RMPH) ang nasambit nga APOR samtang yara naman sa isolated quarantine facility sa Tapaz District Hospital ang tatlo ka ROF’s kag isa ka LSI.
