ROXAS CITY – Naglab-ot sa lima ka pamilya ang apektado sang landslide sa banwa sang Dao sa probinsiya sang Capiz, bangud sa padayun nga pagbubo sang ulan.
Sa exclusive interview sang Bombo Radyo kay Mr. Esperidion ”Speed” Pelaez, action officer sang Provincial Disaster Risk Reduction and Management Office (PDRRMO) – aksyon tabang, ginpahayag sini nga yara na sa evacuation center sang Dao Central Elementary School ang lima ka pamilya ukon 19 ka indibidwal nga gikan sa Poblacion Ilaya, Dao, matapos nga nagtiphag ang duta nga malapit sa ila nga balay.
May 25 ka pamilya ukon 64 ka indibidwal nga gikan sa banwa sang Dao, Mambusao kag Dumalag nga yara na sa evacuation centers, matapos nag-evacuate sa ila mga balay sa kahadluk nga mabutang sa peligro ang ila nga kabuhi bangud sa wala untat nga pag-ulan.
Sa karon nagtaas na sa 86 nga barangay ang apektado sang pagbaha sa Capiz kalakip na ang apat nga barangay sa banwa sang Maayon, 14 sa Sigma, 7 sa Cuartero, 19 sa Mambusao, 14 sa Dao, 5 sa Dumalag, 17 sa Panit-an, 3 sa Pontevedra, 2 sa Dumarao kag isa sa Panay.
Padayun man ang monitoring sang PDRRMO sa bilog nga probinsiya kag nakastandby na ang tanan nga mga response unit.
Samtang nagpromesa naman ang gobyerno lokal sang Capiz nga magahatag sang bulig sa mga evacuees nga yara sa evacuation centers.
