ROXAS CITY – Nakaabot na sa probinsiya sang Capiz ang lima ka mga punong barangay sang siyudad sang Roxas nga nagtambong sa isa ka sinapol sa Baguio City sa pihak sang pamahog sang coronavirus disease (COVID-19) sa pungsod.
Ini ang ginkompirmar ni Punong Barangay Rey Afloro sang Barangay Balijuagan, sining siyudad sang mainterview sang Bombo Radyo.
Ginkompirmar man ni Afloro nga gilayon sila nagsunod sa mandu nga magpaidalom sa self-quarantine bangud sa posibilidad nga nalatnan sila sang amo nga virus gikan sa ila gintambungan nga sinapol.
Kalakip sa kaupod ni Afloro nga nagtambong sa nasambit nga sinapol amo ang mga punong barangay nga sanday Holce Bialen sang Barangay 8, Joseph Tinoy sang Barangay 6, Ligaya Condes sang Barangay Jumaguicjic kag Herminia Dillo sang Barangay Tanque.
Suno kay Afloro sa baylo nga i-avail ang ila flight, nagbiyahe sila sang iya mga kaupdanan pinaagi sa barko.
Aminado man ini nga ila nabatyagan ang paghugot sang mga pagsulundan sa pantalan kun sa diin gintsekyar ang ila body temperature pinaagi sa thermal gun scanner kag gin-usisa man ang ila travel history.
Matandaan nga nauna na nga ginrekomendar sang Department of Interior and Local Government (DILG) sa mga opisyales nga ipaiway ang ila paglakat sa Baguio City bangud sa pamahog sang COVID-19 apang kun indi mapaiway, kinahanglan nila nga magpaidalum sa self-quarantine sa ila pagbalik sa siyudad.
