ROXAS CITY-Ginkompirmar sang Municipal Health Officer sang banwa sang Panitan nga 5 pa gid lamang sa 14 ka mga Punong Barangay nga na close contact ni Capiz Governor Esteban Evan Nonoy Contreras ang nag-abot ang resulta sang Real-Time Polymerase Chain Reaction ukon RT-PCR test.
Sa interview sang Bombo Radyo sa kay Dr. Rosine Avelino ginpahayag sini nga lima pa gid lamang ka mga resulta sang mga RT-PCR ang ila nga nabaton gikan sa Western Visayas Medical Center.
Ini ang ginkalakipan sang Punong Barangay sang Salocon, Pasugue, Capagao, Poblacion-ilaya kag Ilawod.
Ginkompirmar sini nga ang nagpositibo amo ang punong barangay sang Barangay Salocon sang nasambit nga banwa samtang ang apat ka iban pa ang nag-negatibo sa COVID-19.
Gindugang pa ni Avelino 13 ka mga indibidwal ang natigayon na nga ma-trace sang contact tracing team nga may yara sang close contact sa nagpositibo nga opisyal sa barangay kun sa diin isa diri ang ginpaidalom sa RT-PCR test matapos nga nakabatyag sang sintomas.
Sa karon padayon pa nga ginahulat sang Rural Health Unit sang banwa sang Panitan ang resulta sang RT-PCR test sang 11 ka nabilin nga mga punong barangay nga na close contact ni Contreras.
