ROXAS CITY – Posible sa masunod nga semana liwat nga magabalik ang operasyon sang Small Town Lottery (STL), kasunod sang pagbawi ni President Rodrigo Duterte sang suspension sang operasyon sini sa Pilipinas.
Ginpahayag ni Mr. Ian Paclibar, operations manager sang STL-Capiz sa idalum sang 5 Star Gaming Corporation nga ginahikut na nila sa karon ang pila ka mga rekisitos nga ginapangayo sang Philippine Charity Sweepstakes Office (PCSO).
Pila sa mga ini nga dapat mag-deposit ang mga Authorized Agent Corporations (AACs) sa PCSO sang cash bond nga tatlo ka bulan nga share sang PCSO sa Guaranteed Minimum Monthly Retail Receipts (GMMRR) magluwas pa sa ila nga existing cash bonds.
Apang kun mapaslawan ang mga AAC nga ma-remit ang ila nga GMMRR sa ila nga operasyon, otomatiko nga ma-forfeit ang ila nadeposito nga cash bond.
Tanan man nga mga AAC ang may pagapirmahan nga undertakings nga nagasaad sang ila nga obligasyon sa STL agency agreement kag pananglitan nga ila ini nga malapas, gilayon sila nga iga-terminate sang PCSO.
Maga-apela man si Paclibar sa PCSO nga panubuan ang ila bulanan nga ginabayad nga Presumptive Monthly Retail Remittances (PMRR) nga P15 milyones pesos bangud posible nga indi nila ini malab-ot.
Aminado man ini nga may bulan man nga pierde ang operasyon sang STL sa probinsiya bangud may yara sang munisipyo nga wala sang STL sa diin ginalauman nga maka-koleksyon pa kuntani sang P400mil kada adlaw kag may iban man nga banwa nga mahina ang ila nga pataya.
Nahibaluan man nga wala sang bulan nga napaslawan sila nga maka-remit sa PCSO, apang aminado si Paclibar nga may bes nga kulang lamang ang ila ginaremit.
Samtang ginklaro sang operations manager sang STL-Capiz nga ang 5 Star Gaming Corporation sa gihapon ang solomente nga naga-operate sang STL sa probinsiya.
