ROXAS CITY – Madinalag-on nga naaresto sang mga katapo sang Panay MPS ang lima ka mga miyembro sang “Tun-og group” nga amu ang ginatudlo suspek sa pagpangawat sang mga piyesa ukon bilog nga motorsiklo sa probinsya sang Capiz.
Sa interview sang Bombo Radyo kay PLt. Gary Diaz, hepe sang Panay MPS, ginsiling sini nga indi pa nila sa karon mahingadlan ang mga menor de edad nga mga suspek apang nagapang-edaron ang mga ini sang duha ka 16-anyos kag tatlo ka 15-anyos, lunsay mga lalaki, kag residente ang mga ini sang banwa sang Panay kag Pontevedra.
Suno pa diri, gintawag nga ‘Tun-og’ ang ila grupo bangud sa kaaganhon ang mga ini nagapangawat sang piyesa sang motorsiklo ukon bilog gid nga motorsiklo sa primero kag segundo distrito sang Capiz, kutob sa ila maagyan nga motorsiklo sa dalan.
Ba-se sa maid-id nga imbestigasyon sang Panay MPS, kag sa kooperasyon sang opisyales sa barangay, narekober ang duha ka Suzuki smash nga motorsiklo nga ginkawat sang mga suspek sa banwa sang Sigma, kag ang isa ang nagikan sa Tanza Sur.
Narekober man ang isa pa ka motorsiklo sa katubuhan sang pabahay sa Brgy. Rizal, Pontevedra kag nahibaluan nga ini ang ginkawat nga motorsiklo sang Nobyembre 9, sa Brgy. Lus-onan, banwa sang Panay.
Nagapati si Diaz nga posible target sang mga kabataan nga ibaligya sa junk shop ang ila ginkawat nga spare parts kag ang iban nga maayo-ayo pa ang posible igabaligya sa mga motor shops.
Nakasugid man ang mga ini nga may pila pa sila ka miyembro apang indi pa mapalayag sa kahanginan bangud sa nagapadayon nga imbestigasyon.
Sa karon, iga-kustodiya sa DSWD ang mga menor de edad nga suspek tubtob ma-filan ang mga ini sang nagakaigo nga kaso.
