ROXAS CITY – Patay na sang nasapwan ang 50-anyos nga lalaki nga ginaalegar nahulog sa buho sa bahin sang Sitio Sinandigan, Brgy. Mianay banwa sang Sigma.
Ginkilala ang biktima nga si Norberto Olano Villaruel, residente sang Brgy. Majanlud banwa sang Sapian.
Sandig sa Sigma Municipal Police Station, nga nakabaton sila sang panawag nagikan sa punong barangay sang Mianay nga si Delerosa Arroyo nga may yara sang nasapwan nga bangkay.
Sa imbestigasyon sang mga kapulisan, nga takna alas 6 sang aga, Mayo 14 sang nasapwan sang isa ka residente ang bangkay sang biktima nga nagatuwad na sa buho nga may kadalumon nga 7 ka tapak sa higad sang feeder road.
Ang nakakita ang ginkilala kay Maria Neto Coldovero Ubalubao.
Madasig naman ini nga nagpanawag sang bulig sa iya himata agud buliganan nga mapasaka gikan sa buho ang biktima.
Mahibaluan nga katapusan nga nakita ang biktima nga yara sa impluwensya sang makahulubog nga ilimnon samtang ini ang nagalakat pauli padulong sa ila puluy-an.
Posible nga wala sini nakit-an ang buho kun sa diin ini nagdaresto kag nahulog.
Sa karun, yara na ang bangkay sang biktima sa Olano Funeral Homes sa banwa sang Ivisan kag igapaidalom pa sa post-mortem examination, samtang nagapadayon pa ang imbestigasyon sang mga kapulisan.
