ROXAS CITY – Masami nga maka-angkon sang sakit nga prostate cancer ang mga kalalakinhan nga nagapang-edaron sang 50-anyos pataas.
Ini ang ginpahayag ni Mr. Jeiel Mark Ledesma Non-communicable Diseases Coordinator sang Capiz Provincial Health Office sang ma-interview sang Bombo Radyo.
Suno kay Ledesma ang prostate cancer isa ka gamay nga gland sa mga kalalakinhan nga makit-an sa idalum sang bladder, sa diin ini ang naga-contribute sa paghimo sang semen nga importante para sa transport kag nutrition sang mga sperm cells paguha sa kinatawo sang lalaki.
Masami man ini nga mahinay magdako kag naga-angkon lamang sang sintomas sat ion nga mataas na ang stage sini.
Masami nga nakikit-an ang amu nga sakit sa mga kalalakinhan nga obesity ukon katambukon, mahimo man ini nga makuha sa pamilya nga naka-angkon sang prostate cancer ukon iban nga cancer.
Gintuad man sini ang pila ka mga sintomas kag senyales sang nasambit nga sakit sa diin una na diri ang pagkabudlay sa pag-ihi, mahina nga pag-ihi, dugo sa ihi, pagbuhin sang bug-at kag pagsakit sang tul-an, likod balakang kag madamo nga parte sang lawas.
Mahimo man ini nga ma-diagnose pinaagi sang Digital Rectal Exam (DRE), PSA (test sa dugo) kag ultrasound sang abdomen.
Panugyan sini pananglitan nga maka-eksperyensya sang mga nasambit nga sintomas, gilayon nga magpakonsulta sa pinakamalapit nga Medical Oncologist ukon Nephrologists agud temprano nga mabulong kag ma-diagnose.
