Ginaduso sang senado ang Isa ka hagna nga magapanubo sang tubtub 50 percent sang remittance fees para sa mga overseas Filipino workers (OFWs), sa tunga sang nagapadayon nga reklamo angot sa mataas nga balayran sa pagpadala sang kwarta pabalik sa Pilipinas.
Gin-file ni Senator Jinggoy Ejercito Estrada ang Senate Bill No.1074, nga nagatuyo nga direkta nga mabuhinan ang gasto sang mga OFW nga nagapadala sang ila kinitaan pauli. Ang hagna magakinahanglan sa mga bangko kag mga remittance centers nga magpatuman sang katunga nga diskwento sa mga remittance fees kabaylo sang pagtugot sa ila nga mag-claim sang tax deductions para sa ila operational costs.
Base sa datos nga ginsambit, ang remittances sang mga OFWs naglab-ot sa record-high nga $38.34 billion sang 2024—tatlo ka porsyento nga mas mataas sangsa 2023—katumbas sa 8.3% sang gross domestic product sang pungsod kag 7.4% sang gross national income sang pungsod.
Ang mga magalapas ang nagapangatubang sang penalidad, lakip na ang pagkapreso sang tubtob anum ka tuig kag multa nga nagalab-ot sa P50,000 tubtub P750,000, magluwas sa iban pa nga mga penalidad sa idalom sang existing banking laws.
Lakip man sa nasambit nga hagna ang libre nga financial education para sa mga OFWs kag ila pamilya.
Sa kabug-usan, ginapatuman sang hagna ang mas hugot nga pagbantay sa mga remittance services kadungan sang pagpabaskog sang financial capabilities sang mga OFW, isa ka sektor nga padayon nga nagaserbe nga haligi sang ekonomiya sang Pilipinas.
