Ginalauman nga ma-repatriate ang yara sa 50 pa ka mga Pilipino sa Israel subong nga semana sa tunga sang mga pag-atake sa gihapon sa Northern Israel sa pihak sang ginapahayag nga kasugtanan sa ceasefire nga nangin epektibo sang Martes, Hunyo 24.
Suno kay Department of Migrant Workers (DMW) Undersecretary Felicitas Bay, ang ika-duha nga batch sang repatriation sa Israel naka-schedule sa Huwebes, Hunyo 26 ukon sa Biyernes, Hunyo 27.
Nagapangita naman ang Embahada sang Pilipinas kag Migrant Workers Office sa Israel sang iban nga ruta para sa repatriation kasunod sang natabo nga temporaryo nga pagsirado sang Qatar airspace bangud sa pag-atake sang Iran sa US military base sa Doha sang Lunes bilang balos sa Amerika nga nagpasigabong sa ila nga tatlo ka nuclear sites.
Una diri, nag-abot sa Pilipinas ang una nga batch sang 31 ka mga Filipino repatriates kagab-i, June 24.
Suno sa DMW, 19 sa mga ini ang caregiver samtang 7 ang hotel workers.
