Ginabulubanta magalab-ot sa halos 5,000 ka trabaho ang igalunsyar sa pagahiwaton nga ikaapat nga Department of Labor and Employment (DOLE) Project DAPAT Job Fair nga magaumpisa sa Enero 28 tubtob 29 halin alas 9:00 sang aga tubtob alas 6:00 sang gab-i sa SMX Convention Center, Mall of Asia Complex, Pasay City.
Ini agud mabuligan ang mga mamumugon nga apektado sa pagsarado sang mga Philippine Offshore Gaming Operators (POGO), sandig sa direktiba ni Pangulong Ferdinand R. Marcos Jr. nga total ban sa mga operasyon sang POGO sa pungsod.
Ginalauman nga makig-isa man ang 126 nga lokal nga kumpanya kag anom nga overseas employers gikan sa nagkalain-lain nga sektor kasubong sang BPO, logistics, finance, food and beverage, kag retail.
Magaangkon man sang One-Stop Shop para sa mga kinahanglanon nga dokumento sang mga aplikante, kaupod ang SSS, PhilHealth, Pag-IBIG, NBI clearances, kag iban pa.
Samtang, ginaganyat naman ang mga aplikante nga magdala sang madamo nga kopya sang ila nga updated resume, kaugalingon nga ballpen, valid ID’s kag mga pre-employment application requirements.
