ROXAS CITY – Arestado ang 51-anyos nga mister sa gin-implementar nga search warrant sang Criminal Investigation and Detected Group sa Angel Ville, Barangay San Jose, Roxas City kaina pasado alas 3:00 sang kaagahon, Pebrero 5.
Ginkilala ang nadakpan kay alyas Ronald nga residente sang nasambit nga lugar.
Sa interview sang Bombo Radyo kay San Jose Kagawad Elmo Celino, gintawgan ini sang CIDG nga may operasyon sa Angel Ville sa amu nga Barangay.
Sa ginkasa nga search warrant, narekober kay alyas Ronald ang 9mm inggram caliber, onse (11) ka mga bala kag airsoft nga armas.
Wala naman nagalaum si Kagawad Celino nga naga-engaged sa iligal nga buluhaton si Ronald bangud sa pagkakilala sini mabuot ini nga sahi sang tawo.
Ginpanginwala naman sang subject nga iya ang mga armas kag ginpahayag nga ginbilin lamang ini sa iya.
Sa karon, nagapabilin sa kustodiya sang CIDG ang nasambit nga arestado.
