ROXAS CITY – Dakop ang 51-anyos nga lalaki, matapos ginapahayag nga nagpalupok sang iya ginahuptan nga armas luthang sa Sitio Proper, Brgy. Bago, Roxas City.
Ginkilala ang nagreklamo kay Punong Barangay Rolly Hierro, 46-anyos kag residente sang Barangay Bago, samtang ang ginatudlo suspek ang ginkilala naman kay Herman Benedicto, nga residente sang Sitio Proper, Barangay Bago, lunsay sining syudad.
Sa impormasyon nga nakuha sang Bombo Radyo nagikan sa Roxas City PNP, nga suno sa ginpabalhag nga report ni Leo Benedicto, 43-anyos ginpahayag siini nga ang iya utod nagapalupok sang armas luthang kung sa diin nagatuga sang kahadlok kag kakulba sa mga pumuluyo.
Bangud sini, gilayon nga ginrespondihan sang mga otoridad ang lugar kag didto akto nga nadakpan si Benedicto nga naga-uyat sang .45 caliber nga armas lluthang sa guha sang ila kudal.
Mahibaluan nga wala sang lisensya ang nasambit nga armas luthang.
Narekober sa lugar ang 1 ka unit sang 1911 Colt .45 caliber nga armas luthang loaded sang 1 ka bala kag 1 ka magazine.
Sa karun, nagapabilin ini sa karsel sang Roxas City PNP, para sa nagakaigo nga disposisyon.
