Nagbaton liwat sang bulig ang 510 ka benepisyaryo sang Walang Gutom Program sang Department of Social Welfare and Development (DSWD) sa Roxas City subong nga bulan sang Mayo.
Ang mga benepisyaryo amo ang mga pamilya nga na-identify sang DSWD bilang mga “food-poor” ukon labing nagakinahanglan sang suporta sa pagkaon.
Ang programa nagatuyo nga mabuhinan ang gutom kag malnutrisyon sa mga kabalayan nga kulang ang suplay sang pagkaon.
Sa idalom sang Walang Gutom Program, nagabaton ang kwalipikado nga mga pamilya sang food assistance pinaagi sa Electronic Benefit Transfer (EBT) cards nga may balor nga P3,000 kada bulan para makabakal sang masustansya nga pagkaon sa mga accredited nga merkado.
Suno sa DSWD, ang pagpili sang mga benepisyaryo ginabase sa ila database sang mga kubos nga pamilya kag wala ginapaagi sa endorsement sang lokal nga mga opisyal agud masiguro nga ang bulig makaabot sa mga labing nagakinahanglan.
Padayon naman ang ahensya sa pagpalapad sang programa sa nagkalain-lain nga bahin sang pungsod bilang kabahin sang tikang sang gobyerno batuk sa gutom kag kakulangan sang pagkaon sa mga Pilipino.
