CAPIZ- Ginaselebrar sang Pilipinas ang ika-51 nga tuig sang Nutrition Month subong nga Hulyo, nga may tema nga “Food at Nutrition Security, Maging Priority! Sapat na Pagkain, Karapatan Natin!” sa diin nga katuyuan sini nga ipakita ang importansya sang bastante, masustansya, kag abot-kaya nga pagkaon para sa tagsa ka pamilya nga Pilipino.
Sa interview sang Bombo Radyo kay Dr. Leah Del Rosario, Provincial Nutrition Officer sang Capiz Provincial Health Office, iya ginpahayag nga ang mga tikang nga ginapatigayon sang gobyerno amo agud masiguro ang food security sa pungsod.
Dugang pa sini nga ang Philippine Plan of Action for Nutrition (PPAN)para sa mga tuig 2023-2028 ang nagatuyo nga mas mapasanyog ang nutrisyon sang mga Pilipino pamaagi sang mga konkreto nga programa kag polisa.
Nahibaluan nga sang 2024, ginpatigayon ang isa ka pagkay-o sa PPAN agud nga mas mapabakod ang mga priyoridad sa nutrisyon, nga nakasentro sa pag-angkon sang bastante nga pagkaon sa tagsa ka mga lugar sang pungsod.
Para naman sa tuig 2025, ginpakusog pa ang tema sang Nutrition Month agud hatagan pagtamod ang importansya sang food security bilang nagapanguna nga ginatalakay sa nutrisyon sa pungsod.
Pahayag pa ni Dr. Del Rosario, ang food securitynagakahulugan nga kinahanglan may bastante nga masustansya nga pagkain ang tagsa ka pamilya kada adlaw, nga abot-kaya kag madali nga makuha. Kalakip diri ang pagbulig sa mga mangunguma agud makatanom sang mga produkto nga matibay batok sa mga kalamidad kaangay sang bagyo kag grabe nga init, nga masami nagakatabo sa pungsod.
Samtang, ang gobyerno sang Pilipinas padayon nga nagaduso sang mga proyekto agud mabuligan ang mga mangunguma kag agud siguruhon nga ang pagkaon indi lang accessible kundi masarangan sang tagsa-tagsa nga i-avail.
With a report from Bombo Sunnie Mae Batencila
