ROXAS CITY – “First time in history” ang paghiwat sang Capiztahan nga magadugay sang masobra sa kinse diyas nga pagpatigayon sang mga aktibidad.
Ini ang ginpahayag ni Mr. Alphonsus “Al” Tesoro, pinuno sang Capiz Provincial Tourism and Cultural Affairs Office (PTCAO) kag Atty. Luvim Amores, ang Human Resource Management Officer (HRMO) sang Provincial Capitol, sang mainterview sang Bombo Radyo.
Suno sa mga ini, pinasahi ini sa karon nga festival bangud tinutuyo sang Gobernador nga makilala ang probinsya pinaagi sa mga pagahiwaton nga aktibidad nga sa Capiz lamang una makita, sumugod Abril 13 tubtob Mayo 1, 2023.
Magluwas sa mga pagpasundayag sa nagkalain-lain nga produkto kag kultura sang probinsya, magapadulong man diri ang mga kilala nga banda kag mga artista sang isa ka TV netrwork.
Ginpasiguro man diri nga pag-abot sa ekonomiya sang probinsya, makabulig ang pagpalawig sang Capiztahan sa mga magagmay nga palangabuhianan kaangay sa mga tricycle drivers, vendors, manugtahi kag madamo pa, bangud sa mga ginalauman nga mga bisita sa nasambit nga festival.
Subong man, ginpasalig sang PTCAO head nga wala sang ‘dull moment’ ang 19 ka adlaw nga pagselebrar sang Capiztahan, bangud sa mga nakalinyada nga aktibidad nga panigurado nga makapasadya sa mga bisita kag Capiznon.
