Naglab-ot na sa 52 ka mga barangay ang apektado sang ashfall bangud sa padayon nga pagtaas sang aktibidad sang Bulkang Mayon, suno sa Office of Civil Defense (OCD).
Base sa report sang Philippine Institute of Volcanology and Seismology (PHIVOLCS), ang sunod-sunod nga aktibidad sang bulkan nagtuga sang madamol nga abo nga nagtabon sa nagkalain-lain nga bahin sang Albay.
Ang mga barangay nga apektado sang ashfall ginalakipan sang mga banwa sang Camalig, Guinobatan, Daraga, kag Legazpi City, sa diin ginpahamtang man ang mga volunteers kag disaster response teams para sa gilayon nga bulig.
Ginabulubanta nga nagalab-ot sa 4 ka kilometro ang ginpaguwa nga Pyroclastic density currents (PDCs) kon sa diin ginakabig nga pinakadaku humalin sang ulihi nga paglupok sang Mayon.
Suno kay PHIVOLCS Director Dr. Teresito Bacolcol, nagapabilin sa Alert Level 3 ang bulkan nga nagapatimaan sang magmatic unrest kag posibilidad sang mas delikado nga paglupok. Bangud sini, hugot nga ginadumilian ang pagsulod sa 6 km nga Permanent Danger Zone (PDZ).
Ginapanugyanan ang mga residente nga magtinir sa sulod sang balay sa tion nga may ashfall, maggamit sang protective mask, kag siguraduhon nga may tabon ang pagkaon kag tubig agud malikawan ang kontaminasyon.
Sa subong, nagapadayon ang koordinasyon sa tunga sang OCD, PHIVOLCS, kag lokal nga panguluhan agud masiguro ang kaluwasan sang mga pumuluyo.
