ROXAS CITY – Arestado ang isa ka 53-anyos nga mister matapos nga ginkasahan sang drug buy bust operation sang mga katapo sang Provincial Police Drug Enforcement Unit (PPDEU) kag cluster SDET sang Tapaz, Jamindan kag Dumalag MPS, nga may koordinasyon sa PDEA-6, sa Poblacion, Tapaz, Capiz alas-7:19 kagab-i sang Huwebes.
Ginkilala ang nadakpan kay Manuelito Artuz Gloria alyas “Sony Gloria” nga residente sang nasambit nga lugar.
Nakuha sa posesyon ni Gloria ang tatlo tanan ka sachet sang ginaalegar shabu, P500 nga buybust money, 1 ka kaha sang posporo kag P400 nga kaugalingon sini nga kuwarta.
May kabug-aton nga 1 ka gramo ang ang nakuha nga ginaalegar iligal nga droga kag may standard drug price nga P6,800.
Ginpadangat ang suspek sa Iloilo Crime laboratory agud ipaidalom sa drug testing pati man ang nakuha sa iya, kag igakustodiya sa Tapaz MPS antes ang pagpasaka sang nagakaigo nga kaso.
