PONTEVEDRA, CAPIZ – Nagapabilin sa ospital ang isa ka 54 anyos nga lalaki matapos makaangkon sang samad sa nawala nga kamot tuga sang pagpanglabo sa Sitio Sta. Ana, Barangay Binuntucan, Pontevedra, Capiz.
Ginkilala ang biktima kay Lorenzo Estrada kag residente man sang nasambit nga lugar.
Sandig sa nangin imbestigasyon ni Police Corporal John Altamia, imbestigador sang Pontevedra Municipal Police Station, nagainom ang biktima kaupod ang iya abyan sa guwa sang tiyangga sang nagbais sila sang suspek nga si Vicente Tabernilla, 34 anyos.
Diri kag ginaalegar una ginlampusan sang biktima sang botelya ang suspek nga si Tabernilla.
Nagpauli ang suspek apang pagbalik sini sa ginluntaran sang insidente, hinali sini nga ginlabo ang biktima gamit ang bolo.
Gilayon nga gindala sa Bailan District Hospital ang biktima agud madapatan sang nagakaigo nga pagbulong samtang gindala naman sang mga Barangay Peacekeeping Action Team ukon BPAT sang nasambit nga barangay ang suspek sa estasyon sang pulisya.
Ginhunong sa karsel ang suspek apang natigayon man nga makaguwa matapos ang reglementary period of detention.
