ROXAS CITY – Pilas sa magkatuhay nga parte sang iya lawas ang naangkon sang 55-anyos nga lalaki matapos ginlabo sang iya kaugalingon nga hinablos sa Sitio Tambugue , Barangay Bahit, Panitan, Capiz.
Ginkilala ang biktima kay Antonio Dequiña Biba Jr., samtang ang ginapahayag suspek ang ginkilala kay Jhitte Biba Villagracia, 26-anyos lunsay mga residente sang nasambit nga barangay.
Sandig sa imbestigasyon nagikan sa Panitan Municipal Police Station, ginapahayag nga tuyo kuntani nga tsekyaron ni Villagracia ang ginlambo sini nga baka sang nakasugata sini ang iya tiyo sa uyapad nga papuli na kuntani sa iya balay nga malapit man sa ginalambuhan sang iya baka kag hinali na lamang sini nga ginsumbag ang suspek apang wala ini maigo.
Bangud diri, nakabalos si Villagracia pinaagi sa paglabo gamit ang binangon kag gintunaan naman sang pilas sa dughan, abaga, likod kag kamot ni Biba kag nagtinguha nga makapalagyo sa suspetsado agud magpangayo sang bulig sa ila nga Brgy. Kapitan kag gilayon naman nga gintabangan kag ginpadangat sa Roxas Memorial Provincial Hospital (RMPH) para sa nagakaigu nga pagbulong.
Boluntaryo naman nga nagsurrender sa mga kapulisan ang suspetsado apang wala na marekober ang gingamit sini nga binangon sa pagpanglabo.
Sa karun yara na sa kustodiya sang Panit-an Municipal Police Station, ang suspetsado.
Samtang saan nga hiligut-anon ang ginalantaw nga motibo sang mga kapulisan sa natabu nga insidente.
