ROXAS CITY – Ginkustodiya sa Ivisan Municipal Police Station ang isa ka 57-anyos nga lalaki matapos nga nagwaras kag nagapangbangga sa karsada nga may dala nga talibong sa Brgy. Malocloc, banwa sang Ivisan.
Ginkilala ang gin-aresto kay Alfredo Durado Ulam, residente sang sang nasambit nga lugar.
Sandig sa impormasyon nagikan sa Ivisan Municipal Police Station, nga ginpakustodiya sa mga barangay officials sang nasambit nga barangay si Ulam matapos nga nagapangbangga sa mga motorista kag sa mga indibidwal nga nagalabay sa karsada kag may bitbit nga talibong.
Madamo sang mga pumuluyo ang nagreklamo sa amo nga lalaki rason nga ini ang ginrespondihan sang barangay tanod kag gindala sa Ivisan MPS. Posible nga magapangatubang sang kaso nga paglapas sa Commission on elections resolution no. 10728 ang nasambit nga lalaki.
