ROXAS CITY – Ginpasakaan na sang panumbungon nga paglapas sa Republic Act 9165 ukon Comprehensive Dangerous Drugs Act of 2002 ang 57-anyos nga lalaki sa ginkasa nga drug buybust operation sang Provincial Drug Enforcement Unit (PDEU) sang Capiz Police Provincial Office (CPPO) sa Barangay 7, Roxas City.
Ginkilala ang naaresto nga si Cyril Tomasa sang Barangay Adlawan, sining syudad.
Suno kay Police Lieutenant Mark Anthony Garcia, nga masobra na isa ka semana nga ginamonitor ang drug suspek apang subong gid lamang natigayon nga madakpan pinaagi sa ila ginkasa nga operasyon.
Narekober sa posisyon sang drug suspek ang 20 ka sachets sang ginapatihan shabu, 1,000 pesos nga marked money, kag cellphone.
Nahibaluan dugang nga naaresto na sadto ang suspek bangud man sa pagduso sang ilegal nga droga apang napahilway pinaagi sa plea bargaining agreement sang tuig 2017.
Sa baylo nga mag-untat, nagbalik sa iya ilegal nga aktibidad ang suspek.
