ROXAS CITY – Ginahulat na lamang karon sang 57 nga mga empleyado sang Provincial Health Office (PHO)-Capiz kag Department of Health (DOH)-Capiz ang resulta sang swab test matapos nagpositibo sa COVID-19 ang isa nila ka upod sa talatapan.
Ginpahayag ni Mr. Ayr Altavas, Health Education and Promotion Officer sang PHO-Capiz nga gilayon nagpaidalum sa nasambit nga test ang bug-os nga empleyado sang duha ka talatapan para masiguro kun may nalatnan pa ang ikaanum nga confirmed positive sa COVID-19 nga iban nila nga kaupdanan nga health workers.
Aminado si Altavas nga bilang mga high risk contacts ginpaidalum sila sa 14-day quarantine sa isolation facility.
Padayon man ang contact tracing sa iban nga nakasalamula sang 33-anyos nga public health worker nga karon yara sa isolation facility kag ginahibalo kun paano nakuha ang nasambit nga virus.
Gintadlong man ni Altavas ang nagalapta nga report nga kalakip ang 6th confirmed positive COVID-19 patient sa mga personnel nga nagaupod sa pagtransport sang mga specimen sa Western Visayas Medical Center sa Iloilo.
Suno kay Altavas nga wala sang history of travel sa Iloilo ukon diin man nga bahin sang Western Visayas ukon history of contact sa positive case ang ila nga kaupod.
