Arestado ang 58-anyos nga lalaki matapos ginserbihan sang warrant of arrest sang mga kapulisan sa Barangay Poblacion, Dumalag, Capiz.
Ang wala na ginhingadlan nga nadakpan ang residente sang Barangay Duran sa amo nga banwa.
Sa impormasyon nga nakuha sang Bombo Radyo sa Dumalag MPS, ginpahayag nga ang amo nga akusado ang nagapangatubang sa kaso nga homicide.
Ang warrant of arrest ang ginpapanaog kag pirmado ni Hon. Rommel Lacson Leonor, Presiding Judge, Regional Trial Court, Branch 21, Mambusao, Capiz, nga napetsahan sadtong Enero 13, 2025.
Ginrekomendar naman sang korte ang P120,000 nga piyansa para sa temporaryo nga kahilwayan sang akusado.
Sa karon, nagapabilin nga nakahunong sa karsel sang Dumalag Municipal Police Station ang nasambit nga akusado para sa nagakaigo nga disposisyon.
