ROXAS CITY – Nasapwan na lamang nga wala na sang kabuhi ang isa ka 58-anyos nga mangunguma sa Sitio Badas, Barangay Acuña, Tapaz, Capiz.
Ginkilala ang nasambit nga mangunguma kay Proceso Lapastora sang Barangay Tacayan sang nasambit nga banwa.
Base sa inisyal nga imbestigasyon sang Tapaz Municipal Police Station nga katapusan nakita ang biktima sadtong Agosto 6, 2020 kun sa diin nag inom-inom pa ini sa nasambit nga barangay kaupod ang iya mga abyan.
Apang, ginaalegar nga samtang nagapauli na ini ginapahayag nga posible nadalin-as ang biktima sa mabato nga porsyon sang iya gin-agyan rason nga nalampos ang ulo sini sa bato.
Nahibaluan nga yara sa idalom sang impluwensya sang makahulubog nga ilimnon ang biktima sang natabo ang insidente.
Samtang, nagapati naman ang mga kapulisan nga wala sang foul play ang kamatayon sang nasambit nga biktima.
