ROXAS CITY – Pilason ang isa ka 59-anyos nga persona matapos nga ginaalegar ginlabo sa Sitio Tabay, Barangay Barra, Roxas City.
Ginkilala ang biktima nga si Romeo Palmo sang nasambit nga lugar.
Base sa inisyal nga imbestigasyon sang Roxas City PNP nga samtang nagalakat ang biktima hinali na lamang ini nga ginlabo sang suspek nga si Philipe Develos 65-anyos sang amo man nga lugar.
Bangud diri, nag-angkon sang pilas sa nawala nga porsyon sang liog ang biktima nga gilayon naman gindala sa Capiz Emmanuel Hospital para sa nagakaigo nga pagbulong.
Nahibaluan nga nagpalagyo pa ang suspek matapos ang insidente apang natigayon sa gihapon ini madakpan sang mga kapulisan matapos ang ginpatigayon nga hot pursuit operation.
Daan nga hiligut-anon naman ang motibo sang suspek sa paglabo sa biktima.
Sa karon, nakahunong na sa karsel sang Roxas City Police Station ang suspek kag natalana nga pasakaan sang nagakaigo nga panumbungon.
