Igadeploy sang Capiz Police Provincial Office ang 595 ka mga miyembro sang Philippine National Police agud magmentinar sang kalinong kag katawhay sa pag- saulog sang Capiztahan 2025.
Suno kay Police Captain Merrychris Dela Cruz , Public Information Officer sang CPPO, magapatigayon ang CPPO sang Send Off Ceremony antes igadeploy ang mga ini sa ila mga designated nga lugar.
Ini agud masiguro nga mapabilin ang kalinong kag katawhay sang nasambit nga selebrasyon nga magasugod sa Abril 1 tubtub 6 kag magatakop sa 15, kapareho nga bulan.
Pahayag pa ni Captain Dela Cruz, may igapahamtang man sang Task Force Group ang CPPO sa mga inner boarder control sang Roxas City nga nahamtang sa Barangay Balijuagan; Milibili; Banica; kag Bolo Samtang, may Task Force Unit man nga igahamtang sa Outer Boarder sa kabanwahanan sang Pilar, Dumarao, Tapaz kag Sapian.
Panugyan ni Pcapt. Dela Cruz sa mga dumuluong, nga likawan nga magbitbit sang mga deadly kag bladed weapon, armas-luthang kag iban pa agud mangin matalunsay ang aton pag selebrar sang Capiztahan kag mapabilin nga malinong kag matawhay ang pala abuton nga okasyon sa probinsya sang Capiz.
