Nagpakigbahin sang ila mga preparasyon kag advocacy ang Fifth batch sang Lin-ay kag Hangaway sang Capiz 2026.
Ang nasambit nga kompetisyon ang kabahin sang selebrasyon sang Capiztahan 2026 sa Probinsya sang Capiz.
Sa interview sang Bombo Radyo kay Pia Pestaño, Lin-ay sang Mambusao Capiz, iya ginpahayag nga pinaka-importante sa lin-ay kag hangaway sang Capiz ang kaisog kag kusog.
Suno kay Pestaño, pinaagi sa kusog kag kaisog malampuwasan gid ang tanan nga challenges nga ginadala sang isa ka Lin-ay kag hangaway sang Capiz.
Pahayag pa sini nga ang pageant indi lang nga nagarepresent sang imo nga banwa kondi gindala mo sini tang bug-os man nga Probinsya.
Samtang, suno naman kay Ella Samantha Carillo, lin-ay sang Panay, Capiz, dapat ang isa ka lin-ay ang may yara sang pagsalig sa kaugalingon bangud isa ini ka liyabe sa kadalag-an.
Dugang pa niya nga ang purpose sang lin-ay kag hangaway 2026 indi lang basta nakafocus sa beauty kondi naga focus sa tradisyon kag kultura sang Probinsiya sang Capiz.
Ginpakigbahin man ni Kim John Gaspar, Hangaway sang Banwa sang Mambusao, nga ang characteristics nga ginadala sang isa ka hangaway ang may yara sang maayo nga pamatasan .
Suno sa iya, bilang isa ka hangaway indi lang kinahanglan nga may yara ka sang kusog kag kaisog kondi dapat mahimo mo nga makipaghalubilo sa mga tawo nga nagapalibot sa imo.
Samtang suno naman kay Ian Magbanua, Hangaway sang banwa sang Panay, bilang isa ka hangaway dapat mangin maisog kag may yara ka sang maayo nga pamatasan sa tanan nga bagay bangud sa sini nga pamaagi madala mo ang imo kaugalingon bisan diin ka makadto.
Para sa iya ang hangaway indi lang sa ginatawag nga pagwapo-gwapo kondi diri mo maipakita kon ano ka nga klase sang tawo agud mangin role model sa mga kabataan.
