ROXAS CITY – Anom ka mga indibidwal ang nadakpan sa ginkasa nga operasyon sang gintingob nga pwersa sang Department of Energy, Bureau of Fire Protection – Roxas City Fire Station, kag Roxas City Police Station sa siyudad sang Roxas kag probinsiya sang Capiz.
Una diri, nadakpan sa banwa sang Ivisan sanday Salvacion Mendoza, 48 anyos sang Barangay Ondoy nga nakuhaan sang 290 ka litros sang diesel, 28 litros sa gasolina kag mga botelya, Noel Once Capapaz, 43 anyos sang Barangay Mianay nga nakuhaan sang 126 tanan ka litro sang gasolina, 34 litros sang diesel kag mga botelya, Oscar Arrojado, 41 anyos sang Barangay Ondoy nga nakuhaan sang 47.7 litros sang gasolina, kag 100 litros sang diesel kag si Romulo Chu Seraspe, 75 anyos sang Barangay Poblacion Norte nga nakuhaan naman sang 9 ka drums kag anom ka containers sang diesel kag 6 ka containers sang gasolina kag iban pa nga mga kagamitan nga ginagamit sa iya pagbaligya.
Nadakpan man sa Barangay Bolo, Roxas City sanday Bermie Otocan kag Stephanie Capapas kun sa diin narekober ang 26 litros tanan sang gasolina, mga botelya nga wala sang unod kag cash nga nagalab-ot sa P1, 280.
Ang mga nagkaladakpan ang magapangatubang sa panumbungon nga paglapas sa Batas Pambansa Blg. 33 bangud sa ilegal nga pagbaligya sang mga produktong-petrolyo.
