ROXAS CITY – Gindala sa Roxas City crisis center ang anom ka mga indibidwal nga magalantaw kuntani sang palumbaanay sang motorsiklo sa Barangay Bato, Roxas City nga wala nagasuksok sang face mask kag wala man naga-obserbar sang physical distancing.
Base sa pagpakig-angut sang Bombo Radyo sa Roxas City Police Station, nahibaluan nga isa ka concerned citizen ang nagpanawag sa kapulisan kag nagsugid nga may patigayunon naman nga ilegal nga palumbaanay sang motorsiklo sa amo nga lugar.
Gilayon nga nagresponde ang mga kapulisan kag katapo sang Traffic Management Unit (TMU) apang madasig nga nakapalagyo ang iban nga mga indibidwal nga nagapatigayon sang ilegal nga aktibidad kun sa diin nagkalabilin lamang amo ang anom ka mga persona.
Kalakip sa nagkaladakpan amo sanday Louie John Versoza sang Barangay Culasi, Roxas City; Marwin Elip sang Barangay Dinginan; Vincent Lacson sang banwa sang Jamindan; John Michael Luciño sang Barangay Lawaan; Edrian Mark Cabio sang Barangay Dinginan kag Jimmy Agris sang banwa sang Tapaz.
Magluwas sa indi pag-obserbar sang pila ka mga health protocols, natukiban pa sang mga katapo sang (TMU) ang iban nga bayolasyon sang mga ini kapareho sang no side-mirror kag no driver’s license violation.
