Apektado sang baha ang pila ka mga humayan sa 6 (anom) nga kabanwahanan sa probinsya sang Capiz bangud sa bagyong Kristine.
Sa interview sang Bombo Radyo kay Raoul V. Perez, Acting Provincial Agriculturist, sandig sa inisyal nga assessment kag report nga nabaton sang mga ini, yara na sa 961 ka mga farmers ang naapektuhan kag kapin 112 hectares ang ginbilin nga halit sang bagyong ‘Kristine’ sa agrikultura nga kun sa diin ginlakip na ang nalubog sa tubig-baha nga mga ulumhan.
Dugang pa ni Perez, ginpahayag sini nga 6 palang ka mga kabanwahanan ang nakasumiter sang report kun sa diin ini ang banwa sang Maayon, Sigma, Panit-an, Cuartero kag Pilar kalakip ang syudad sang Roxas ang nabalhag nga partially damage.
Nagdangat naman sa 76 hectares ang totally damage nga kun sa diin nalubog sa tubig-baha ang mga kaumahan kag indi na mapuslan sang mga mangunguma tuga sang madugay nga paghubas sang tubig.
Sa karon, nakahanda naman ang Department of Agriculture nga maghatag sang bulig sa mga mangunguma nga apekatdo sang bagyong Kristine.
